Þriggja liða Hafnarfjarðarmóti lauk í dag þegar FH og Þór frá Akureyri mættust í lokaleik mótsins. Haukar unnu fimmtán marka sigur á Þór í gærkvöldi og tryggðu sér þar með sigurinn á mótinu en Haukar unnu FH fyrr í vikunni með þremur mörkum.

Það var allt annað upp á teningnum hjá Þórsliðinu í dag frá leiknum í gær þar sem Haukar fóru illa með þá. Þórsrar byrjuðu töluvert betur í leiknum í dag og komust mest fjórum mörkum yfir í fyrri hálfleik 10-6. Staðan var hinsvegar jöfn í hálfleik 15-15.

FH-ingar reyndust hinsvegar sterkari aðilinn í seinni hálfleik og unnu að lokum þriggja marka sigur 27-24 þar sem Jón Bjarni Ólafsson var markahæstur FH-inga með sjö mörk en Oddur Grétarsson var markahæsti leikmaður leiksins með átta mörk.

Markaskorun Þórs: Oddur Grétarsson 8, Arnór Þorri Þorsteinsson 5, Sigurður Ringsted Sigurðsson 3, Arnviður Bragi Pálmason 3, Jón Ólafur Þorsteinsson 2, Aron Hólm Kristjánsson 2, Þórður Tandri Ágústsson 1.

Markaskorun FH: Jón Bjarni Ólafsson 7, Símon Michael Guðjónsson 5, Garðar Ingi Sindrason 4, Þórir Ingi Þorsteinsson 4, Bjarki Jóhannsson 2, Ómar Darri Sigurgeirsson 2, Einar Örn Sindrason 2, Birkir Benediktsson 1.