Föstudaginn 29. ágúst næstkomandi fer fram kveðjuleikur Arons Pálmarssonar þegar FH og ungverska stórliðið, Veszprém mætast í Kaplakrika. Rúmlega 1500 miðar eru nú þegar seldir á leikinn og í kringum 300 miðar eru eftir.

Þetta staðfesti Sigurgeir Árni Ægisson framkvæmdastjóri handknattleiksdeildar FH í samtali við Handkastið fyrr í dag. Hægt er að kaupa miða á leikinn hér.

FH-ingar ætla að gera þennan dag eftirminnilegan í meira lagi en húsið opnar 16:00 þar sem veitingar og annar varningur verður til sölu. Dagskráin hefst síðan rétt fyrir klukkan 18:00 þar sem hafnfirskir tónlistarmenn stíga á stokk. Jón Ragnar Jónsson, Friðrik Dór Jónsson, Jóhanna Guðrún Jónsdóttir og Patrik Snær Atlason hafa boðað komu.

Leikurinn hefst síðan um 18:30 og eftir leik verður Aron Pálmarsson heiðraður

Ungverskaliðið mun mæta með alla sína bestu leikmenn til Íslands og æfa í Kaplakrika í nokkra daga áður en leikurinn verður spilaður. Samkvæmt heimildum Handkastsins kemur Veszprém hingað til lands og æfa dagana 26. til 31. ágúst. 

Aron lagði handboltaskóna á hilluna undir lok síðasta tímabils og lauk því ferlinum með ungverska liðinu en Aron lék með stærstu félögum Evrópu á sínum ferli.

Aron fór í atvinnumennsku aðeins 19 ára gamall er hann gekk til liðs við Kiel í Þýskalandi. Þar varð hann Þýskalandsmeistari fimm sinnum, bikarmeistari tvívegis og vann Meistaradeildina tvisvar með liðinu.

Hann lék síðar með Barcelona á árunum 2017-2021 þar sem hann var í stóru hlutverki meðan liðið vann allt sem hægt var að vinna í heimalandinu. 

Þá lék Aron einnig með Álaborg í Danmörku og varð með liðinu danskur bikarmeistari. Aron snéri heim úr atvinnumennsku 2023 og vann Íslandsmeistaratitilinn með sínu uppeldisfélagi en snéri svo aftur í herbúðir Veszprém í Ungverjalandi fyrir áramót og vann ungverska meistaratitilinn með liðinu áður en skórnir fóru á hilluna.

Aron á að baki glæstan landsliðsferil, hann lék 182 leiki fyrir Ísland og skorað í þeim leikjum 695 mörk.

Aron vann bronsverðlaun með ís­lenska landsliðinu á EM 2010 og þá var hann kjörinn íþróttamaður ársins á Íslandi 2012.